Një moment i rëndësishëm diskutimi në Parlament; kryeministri pranon se në Himarë ka minoritet grek

Diskutimi i kryeministrit Edi Rama për reformën territoriale ka përfshirë në mënyrë të zgjeruar edhe çështjen e Himarës. Rama është thelluar në çështje të së drejtës dhe të historisë, ka sjellë si shembull “reportazhin” e Eqrem Çabejt në vitin 1936 në këtë zonë për të kaluar në finale në një pohim të diksutueshëm. “Në Himarë ka minoritet grek:, ka thënë Rama, pohim ky që nuk gjen mbështetje zyrtare në dokumentet e shtetit shqiptar. Kështu këtu, http://minoritetetshqiptare1.wordpress.com/2013/01/25/te-dhena-mbi-minoritetin-grek/, thuhet qartë se minoriteti grek është i përqendruar në Gjirokastër, Përmet dhe Sarandë. Për Himarën deri më sot është njohur dygjuhësia. Vangjel Dule i PBDNJ-së ka kapur momentin dhe duke replikuar me Ramën nuk ka munguar që ta falënderojë për pohimin se në Himarë ka minoritet. Tani këtu çështja mund edhe të kalojë pa ndonjë zhurmë të madhe, por pohimi i kryeministrit me siguri që do të instrumentalizohet, edhe pse shtjellimi i tij për ndarjen e re i mëshonte kritereve që nuk kanë si prioritet vetëm shqetësimet e pakicave. Përtej kësaj, mazhoranca duket e vendosur ta zgjidhë këtë çështje në favor të hartës së re, por edhe njëherë, është e mundur që pohimi i Ramës t’i ketë hapur vend një diskutimi të ri politik.

Ja një fragment nga fjala e Edi Ramës e cila mendojmë se ka rëndësi:

“Kur vjen puna për disa çështje delikate që lidhen me historinë dua t’i jap fund një debati që zgjatet prej 20 vitesh dhe që lidhet me Himarën. Për mua e për ne Himara është si Shkodra, Tropoja, Dibra e Kavaja e si gjithë bashkitë që u krijuan bazuar në kriteret e zonës funksionale, dhe nuk ka asnjë kriter tjetër. Por, fakti që në Himarë jeton një pjesë e minoritetit grek nuk nënkupton asnjë gjë tjetër veç respektimit të lirive dhe të drejtave individuale të tij. Këtë ne nuk e kemi njohur sot, por e kemi njohur e do ta respektojmë gjithmonë. Megjithë përpjekjet e vazhdueshme të shumëkujt që ka dashur ta shikojë Himarën ashtu siç ajo nuk është. Meqë përmende dhe origjinën time, jam krenar që jam një pjesë nga Himara, dhe nuk e quaj epërsi që jam shqiptar, por jam shqiptar. Nuk më bën të ndjej superioritet ndaj grekëve, por as të ndihem inferior...”

s.z