Slideri Kryesor

Teatri politik i disa muajve duket se po shkon drejt fundit. Dritarja e Shpresës, zhurma në Parlament e kështu me radhë, ngjajnë se po zëvendësohen nga ndërzimi i zakonshëm mes dy partive kryesore, deri më tani non grata për njëra-tjetrën. Raportohet se është rënë dakord për dy komisione hetimore; një për të dhënat e sistemit TIMS dhe tjetri për koncesionet në shëndetësi. Qesharake kur mendon se çështjet po hetohen penalisht.

Ish-zv.presidenti sirian, Rifaat al-Assad, do të vihet nën akuzë në Zvicër. Zyra e Prokurorit të Përgjithshëm të Zvicrës (OAG) njoftoi se do të ngrejë akuza ndaj ish-oficerit të ushtrisë siriane, për disa krime që mendohet se janë kryer në shkurt 1982, gjatë një përleshjeje famëkeqe midis ushtrisë siriane dhe opozitës islamike në qytetin e Hamës, në Sirinë perëndimore.

Al-Assad është xhaxhai i presidentit aktual të Sirisë, Bashar al-Assad.

Amerika po përballet me një "rend botëror gjithnjë e më të brishtë", të tensionuar nga konkurrenca e fuqive të mëdha, sfidat transnacionale dhe konfliktet rajonale. Ky është konkluzioni i agjencive amerikane të inteligjencës në një raport të përbashkët, mbi gjetjet e të cilit raportuan në Senat.

Pamjen në fjalë e has çdo mëngjes rreth orën 09:00 në Tiranë. Në atë që quhet zona kryesore e saj në Unazën e Vogël. Makinat që mbledhin mbeturinat, ndërkohë që këto të fundit janë rrugica e përhereshme mbi asfaltin e kryeqytetit. Nuk ka sy të mos e shohë Tiranën sesa e pistë është; nuk ka mendje të mos bezdiset nga deformimi urban dhe kaosi i ndërtimeve, anarkia e çstilizimit që ka imponuar rregullin e vet unikal.

Greqia po mendon të ndryshojë qëndrim mbi furnizimin me armë të Ukrainës, duke paralajmëruar dërgimin e sistemit S-300. Lajmi bëhet i ditur nga gazeta “Kathimerini”, sipas së cilës qëndrimi i Athinës lidhet me hapjen e mundësive të furnizimit nga SHBA të sistemit “Patriot” për Greqinë. Kemi të bëjmë më shumë me një gjest të vullnetit të mirë sesa ndihmë reale, pasi sistemit në fjalë është aktualisht i vjetër krahasuar me armatimin që është në veprim.

Lëvizjet e fundit të Presidentit Vuçiç për të spostuar Ana Brnabiç si kryeministre duke i dhënë postin e kryetares së Parlamentit, po lexohen si ndryshime që lidhen me krizën politike në Serbi.

Kryetari i Forumit për Marrëdhënie Etnike në Serbi, Dushan Janjiç, flet për lëvizje që synojnë të ruajnë ekuilibrat brenda partisë në pushtet.

SHBA po e kushtëzon përdorimin e aplikacionit Tik-Tok me ndërprerjen e lidhjeve të tij me kompaninë kineze mëmë. Aplikacioni popullor shihet si rrezik për sigurinë kombëtare, përmes transmetimit të të dhënave të qytetarëve amerikanë te qeveria e Pekinit.

Një propozim dypartiak i çuar në Kongres pasi ka marrë dritën jeshile në Komitetin e Tregtisë dhe Energjisë, kërkon nga gjiganti kinez ByteDance, pronar i TikTok, t'i shesë aplikacionin popullor një entiteti amerikan, brenda afërsisht 180 ditëve nga hyrja në fuqi e projektligjit.

Në Norvegji, gjatë vitit që lamë pas, kulturat e salmonit kanë pasur humbje të mëdha. Sipas një raporti të Institutit Veterinar Norvegjez, 62.7 milionë salmonë kanë ngordhur në ferma në të ashtuquajturën 'faza e detit', pra në atë në të cilën peshqit jetojnë brenda gardheve të instaluara në zonat bregdetare. Shkalla e vdekshmërisë ishte 16.7%, duke shënuar një rritje si në terma absolute ashtu edhe në përqindje (në vitin 2022 shkalla ishte 16.1%).

Prej disa javësh tashmë është duke u zhvilluar një protestë e banorëve të zonave të Lumit të Vlorës për ndërtimin e një ujësjellësi që do të çojë ujin në Himarë. Përmes disa kronikave televizive mund të shihen banorë të zonës që paralajmërojnë përshkallëzim të protestës dhe se përmes këtij ujësjellësi do të cenohet e gjithë zona. Në vitin 2022, në të njëjtën zonë pati një tjetër reagim - atëkohë për ndërtimin e katër hidrocentraleve në lumin në fjalë – duke sinjalizuar kështu për interesa të mëdha që lobojnë për pasuritë e zonës. 

Pornhub dhe dy sajte të tjera për të rritur kundërshtojnë rregulloren e re të BE-së, e cila parashikon opsionin e verifikimit të moshës së përdoruesve.

Akti i Shërbimeve Dixhitale të BE-së (DSA) hyri në fuqi gushtin e kaluar, me synimin për të futur brenda kornizës së ligjit platforma shumë të mëdha në internet, mendohet se mund të përbëjnë "rrezik sistemik" për shoqërinë.