Blloku Bota

Presidenti francez Emmanuel Macron ka dhënë së fundmi një intervistë në spanjollen “El Pais” përmes së cilës ka përcjellë ndër të tjera edhe disa konsiderata për Rusinë dhe gjendjen e saj. 

Besoj se shkaku i kësaj lufte është një dukuri e drejtuar në themel nga kriza e modelit rus. Rusia si një fuqi po kërkon vetveten dhe fatin e saj. Nuk besoj se kjo luftë e ka origjinën në Europë

Presidenti rus, Vladimir Putin, ka deklaruar gjatë një takimi në një prej njësive që janë degë e prodhuesit të raketave, Almaz-Antey, se Rusia do ta fitojë luftën në sajë të heroizmit të njerëzve të vet dhe sektorit të industrisë ushtarake. 

Aktualisht është paralajmëruar një ofensivë e re dhe duket se Kremlini ka dalë nga kllapia e keqllogaritjes fillestare duke dëshmuar se po u qëndron sanksioneve.

Gazeta gjermane “Welt” ka publikuar një investigim përmes të cilit sjell intervista të disa politikanëve të rëndësishëm bullgarë dhe ukrainas, të cilët zbulojnë se Ukrainën në muajin prill të vitit 2022, pra 1 muaj e gjysmë pas invazionit rus, e ka shpëtuar në një pjesë të konsiderueshme ndihma nga Sofja.

U Dërguari Special i Britanisë së Madhe për Ballkanin Perëndimor Stuart Pich ka deklaruar për gazetën serbe “Kurir” se të dyja palët e përfshira në dialogun e gjatë, pra Serbia dhe Kosova, nuk duhet t’i shohin detyrimet e marrë në proces si kërcënim. Sipas tij, edhe Asosacioni i Komunave Serbe është një detyrim që duhet parë në optikë konstruktive.

Pas katër vjetësh hetimesh, 13 anëtarë të grupit “Barjols” në Francë kanë hyrë në gjykim nën akuzën konspiracionit për kryerjen e një akti terrorist. 11 meshkuj dhe 2 femra të moshës 26-66 vjeç akuzohen se po përgatisnin ndër të tjera vrasjen e presidentit francez, Emmanuel Macron, sulme ndaj xhamive, imigrantëve etj. 

Beogradi zyrtar ka lëshuar ankesën e parë publike për rekrutimin nga njësitë grupit Wagner të qytetarëve serbë. Gjatë një transmetimi televiziv, presidenti i Serbisë, Aleksander Vuçiç bëri pyetjen retorike: 

Pse ju, duke nisur nga Wagner, bëni thirrje kujtdo në Serbi kur e dini se kjo shkon kundër ligjit tonë? 

Boris Pistorius do të jetë ministri i ri gjerman i Mbrojtjes. Ai është 62 vjeç dhe ka përvojë si politikan, me njohje në fushën e sigurisë dhe të historisë. Pistorius vjen nga partia e kancelarit Olaf Scholz dhe aktualisht mban detyrën e ministrit të Brendshëm në landin e Saksonisë së Poshtme. Ai konsiderohet si një njeri me mënyrë të drejtpërdrejtë të foluri dhe televizoni “NDR” e cilëson atë si:

të paduruar, me raste shfaqet si arrogant dhe që nuk pajtohet kollaj me ata që është mërzitur

Kosova nuk do të lejohet të marrë pjesë në Organin e Rregullatorëve Europianë për Komunikimet Elektronike, BEREC. Në vendim e Gjykatës Europiane të Drejtësisë thuhet se anulohet vendimi i Komisionit Eurpian për sa kohë që ai nuk ka fuqi që ta zbatojë atë. Po ashtu, thuhet se funksioni i vetëm i Komisionit Europian në BEREC është të kontrollojë funksionimin e duhur të rregullores.

Presidenti maqedonas, Stevo Pendarovksi e ka cilësuar Ballkanin Perëndimor si pika e dobët e arkitekturës europiane të sigurisë. Duke folur në Forumin Ekonomik Botëror, Pendarovksi ka folur për një rrezik nga Rusia duke bërë thirrje që SHBA t’i kushtojë më shumë rëndësi rajonit.

Presidenti turk, Recep Tayyip Erdogan, ka deklaruar se Suedia dhe Finlanda duhet të dorëzojë 130 shtetas turq të cilët ai i quan terroristë, nëse duan që të hyjnë në NATO.

Së pari dhe mbi të gjitha, ata duhet të ekstradojnë rreth 130 terroristë në mënyrë që kërkesa e tyre të kalojë në Parlamentin tonë; për fat të keq ata nuk e kanë bërë këtë gjë ende

është shprehur Erdogan në një takim me të rinj.