Pollo mbron Censusin: Refuzimi ishte vetëm 1,04 për qind

Rezultatet e Censusit kanë zënë të dalin çikë e nga një çikë, dhe të gjitha të dhënat që jepen futen në filtrin e dyshimit, nënvizohen, krahasohen, ballafaqohen me perceptimet, kundërshtimet, të dhënat e mëparshme, etj. Kush ka pasur vërejtje para e gjatë procesit, kapet fort pas të dhënave “kontradiktore”, dhe mbi to motivon vijimin e fushatës kundër Censusit. Por njeriu që ka dalë në skenë si organizatori i këtij Censusi, Genc Pollo, i hedh poshtë pretendimet e zërave të tillë.

Debati është fokusuar gjatë gjithë kohës tek përmasa etniko-religjioze e këtij procesi, dhe Pollo gjen rast, këtë herë ndoshta mbi bazën e të dhënave të përpunuara të INSTAT-it që atij mund t’i kenë mbërritur përpara nesh, të hedhë poshtë insinuatat e dyshimet. “Zhurma, shpeshherë me fjalë boshe që e shoqëroi censusin, ishte e motivuar nga arsye krejt të tjera dhe nuk lidhej me censusin dhe numërimin e popullsisë; ajo që e dallon këtë census nga ata të mëparshmit ka qenë përfshirja e të gjitha minoriteteve”, tha ai mbrëmë për televizionin AS, duke nxjerrë si argument kryesor shkallën e ulët të refuzimit: “shkalla e refuzimit të popullsisë ishte 1.04 për qind, pra, jashtëzakonisht e ulët, më e ulët se sa në vendet e Europës Perëndimore".

Gazetari do duhej ta pyeste pse po vonohet përpunimi i të dhënave që kanë të bëjnë me çështjet “delikate” të etnisë e të fesë, por një pyetje e tillë nuk iu bë.

E.G.