“Partia Faqezi” dhe hyrja në ujë e popullsisë

Siç kemi njoftuar në një lajm të mëparshëm në respublica.al (http://www.respublica.al/artikuj/2011/12/26/berisha-shpall-armikun-publik-numer-1), Berisha ka deklaruar se fakti që vetëm 1% e shqiptarëve refuzuan të marrin pjesë në Census, tregon se “Partia Faqezi” përkrahet vetëm nga 1% e shqiptarëve. Këtu ai ka aluduar për Aleancën Kuqezi, e cila bëri thirrje për bojkotim të Censusit, për shkak të përfshirjes në të të pyetjeve rreth etnisë dhe fesë. Por vërtet të ketë qenë refuzimi i pjesmarrjes 1%?

Në bazë të shifrave zyrtare të INSTAT-it, në dekadën e fundit kanë lindur mesatarisht rreth 50 mijë vetë në vit në Shqipëri dhe kanë vdekur rreth 25 mijë në vit. Pra, në qoftë se nuk do të kishte fare emigrim, popullsisë rezidente në Shqipëri do t’i ishin shtuar rreth 250 mijë vetë. Por sipas Censusit, popullsia jo vetëm nuk u shtua, por përkundrazi hyri në ujë me rreth 240 mijë vetë. Dhe shpiegimi që dha INSTAT-i ishte se kjo tkurrje ka ardhur nga emigracioni. Me fjalë të tjera, sipas INSTAT-it i bie që rreth gjysëm milion shqiptarë të kenë emigruar vetëm gjatë dekadës së fundit (ndërkohë që asnjë emigrant të mos jetë kthyer në Shqipëri). Një skenar jo fort i besueshëm ky!

Mos ndoshta refuzuesit e Censusit kanë qenë më shumë se 1-përqindëshi që thotë Berisha?

E.Zaloshnja