Arkiv-Lajme

Edhe kjo ditë nuk kaloi pa një koment mbi librat që dominuan atmosferën e Panairit të Librit, që u mbajt para disa javëve. Pandeli Majko flet në Shqip për librin e kryetarit të PS-së, që sipas tij ka një titull depresiv (s’e ka keq). Majko ende s’e la lexuar të tërin librin (Çudi! Duket sikur po lexon Kapitalin e Marksit), dhe në komentin e tij fokusohet në mënyrë të veçantë tek një personazh i librit, sidomos në qëndrimin që ky personazh ka mbajtur kur u publikuan fotot nudo të Edi Ramës. Ky personazh quhet … Pandeli Majko.

Kryeministri e ka hapur mbledhjen sotme të qeverisë me një sqarim në lidhje me ngjarjen e datës 12 dhjetor, kur gjatë ceremonisë së 21-vjetorit të themelimit të PD-së ai pati një përkeqësim të menjëhershëm të gjendjes shëndetësore, çka e detyroi të ndërpriste fjalën e tij dhe të dërgohej në spital nga truprojat.

Sipas Berishës, gjithçka ka qenë në kuadrin e një viroze, e cila mund të krijojë episode të tilla në organizmat që reagojnë fuqishëm.

Berisha ka firmosur ditët e fundit një akt normativ që cakton vlerën prej 84.7 miliardë lekësh si kufi të sipërm për shtesën gjatë këtij viti të borxhit publik. Por sipas Ministrisë së Financave borxhi i akumuluar në fillim të vitit ishte 715.3 miliardë lekë. Pra, i bie që në fund të vitit, borxhi i akumuluar të arrijë vlerën 800 miliardë lekë. Mirëpo sipas ligjit për menaxhimin e sistemit buxhetor (Neni 58 i Ligjit Nr.9936, datë 26.6.2008), borxhi i akumuluar publik nuk duhet të kalojë vlerën 792 miliardë lekë.

568 mijë shqiptarë jetojnë në Itali, sipas raportit Kombëtar XVII për Migracionin 2011, i përgatitur nga Fondacioni ISMU (Iniciativat dhe Studimet mbi Multi-Etnicitetin). 483 mijë janë rezidentë me “letra” të rregullta në shtetin fqinjë.
Sipas raportit shqiptarët janë kategoria e tretë e emigrantëve në Itali, me rumunët në vendin e parë dhe marokenët në të dytin. Sipas të dhënave, rumunët e emigruar në Itali janë mbi 1 milion (969mijë me qendrim të ligjshëm aty), ndjekur nga 575 mijë marokenë (nga të cilët 452 mijë me letra të rregullta).

Revista Time, e përjavëshmja më e famshme në botë me një audiencë prej 25 milionë lexuesish, ka zgjedhur Kryeministrin turk Rexhep Tahip Erdogan si njeriun e vitit 2011. Erdogan është njeriu që po forcon pozitat e një demokracie islame dhe që e ka ngritur Turqinë si ekonomia e dytë me rritjen më të shpejtë në botë. Ai nuk është arab vetë, por vlerësohet shumë mes botës arabe, sipas një sondazhi të universitetit të Merilendit. Vizitat e tij diplomatike në botë mbledhin turma fansash që do të bënin xheloz edhe një rokstar.

Për herë të parë në historinë e shtetit Shqiptar, privatizohet 100% e aseteve që kanë të bëjnë me zonën më të pasur me naftë në Shqipëri. Komisioni Parlamentar i Ekonomisë, pavarësisht kundërshtimeve të opozitës, miratoi sot pasdite vetëm me votat e shumicës parlamentare privatizimin e kompanisë “Albpetrol”. Sipas argumenteve të opozitës në pakicë kompania nuk duhej të privatizohej; një zgjidhje më e përshtatshme është dhënia me koncesion e kompanisë deri më sot shtetërore.

Gara e aplikimeve për postin e Avokatit të Popullit ka tërhequr vëmendjen e media-s, ngaqë është një praktikë e panjohur; është efekti ndjellës që ka një risí. Në procedurën e përzgjedhjes nuk është se ka të reja çdo ditë (s’ka si të ketë e s’ka ç’të ketë), por mediat gjejnë ndonjë gjë për ta dhënë si lajm. Dhe në fakt, e kanë ndjekur hap pas hapi këtë konkurs herë me synimin për të informuar, e herë me synimin për t’i gjetur ndonjë cen kësaj që po ndodh.

Megjithëse nuk ka asnjë llogari për të fshehur, Zoti në mënyrë enigmatike shfaqet në Zvicër, përgjatë eksperimenteve Atlas e CMS, që kishin detyrën për të zbuluar praninë e Bosonit të Higgs-it. Rëndësia e Bosonit të Higgs-it është ekstremisht e rëndësishme për të kuptuar Universin ku jetojmë. Besoj ju kujtohet legjenda se në Zvicër, nga përplasjet e protoneve në brendësi të aparaturave të krijuara enkas, do të krijohej një vrimë e zezë që do të gëlltiste në fillim Zvicrën e më pas të gjithë planetin. Kjo nuk ndodhi, siç dhe mund të perceptohet lehtësisht.

Ardian Hoxha, djali i biznesmenit kosovar Remzi Hoxha, i zhdukur në rrethana që implikojnë regjimin e parë ‘Berisha’ (1992-1997), ka dhënë një intervistë për agjencinë e lajmeve AMA, në të cilën jep versionin e vet të ngjarjes tragjike. Sipas tij, babai i tij u ka mbetur në dorë gjatë torturave njerëzve të Gazidedes, ndërsa për këtë të fundit hamendëson se “i është shpejtuar vdekja”.

Kur u njoftua që sheshi Skënderbej do të hapej për festa, të gjithë u gëzuan. Sheshi do t’u kthehej njerëzve. Tani që sheshi është hapur dhe makinat e kanë më të lehtë të kalojnë nga rruga e Durrësit tek 9-katëshet, po duket më qartë se çfarë kemi fituar.

Pamja e sotme në shesh është ajo e makinave që rrotullohen me shpejtësi, dhe e njerëzve që vrapojnë si lepuj në vijat e bardha që të mos shtypen. Vetëm 2 gjëra rrinë pa lëvizur, një bredh Krishtlindjeje në mes dhe një polic që kruan veshin me tabelë aty pranë.