Arkiv-Lajme

Partia Socialiste ka vendosur sot për përjashtimin e deputetit Kastriot Islami. Kërkesa për përjashtimin e deputetit Islami u bë nga kryetari i Partisë Socialiste, Edi Rama në mbledhjen e parë të Kryesisë së re. Rama ka kërkuar nga Grupi Parlamentar që të marrë masa për Islamin në respekt të rregullores. Dita e sotme ka qënë e plotë mediatikisht, me këtë ngjarje, duke patur parasysh „breaking news“-et për daljet e Islamit nga mbledhja sa herë brenda selisë së PS-së nuk kishte televizione.

Sot në orën 11:00  KQZ-ja mblidhet për të shqyrtuar në rend dite Projekt-vendimin: “Për shqyrtimin e kërkesës së gjashtëmbëdhjetë nismëtarëve për pajisjen me fletë-tip për mbledhjen e nënshkrimeve të nevojshme për referendum të përgjithshëm për shfuqëzimin e një pjese të ligjit nr.10463, datë 22.09.2011 “Për menazhimin e integruar të mbetjeve”.

Kjo është përpjekja e dëshpëruar e një grupi njerëzish që me anë ligjore të mbrojnë vendin nga një ligj i cili rrezikon jo vetëm mirëqenien e brezave të sotëm, por sidomos të atyre të nesërm.

Dje është mbajtur një konferencë mbi çështje të gjuhës shqipe me titull “Gegnishtja sot”, e organizuar nga Instituti i Promovimit të Vlerave në Gjuhën Shqipe, i drejtuar nga Primo Shllaku.

Presidentja e Kosovës znj Ahtifete Jahjaga gjatë vizitës në SHBA la përshtypjen e një gruaje të kujdesshme që flet me delikatesë e butësi, mënyra këto që ranë në sy dhe të medias e diplomatëve amerikanë.

Në videon që do t’ju paraqesim, Ahtifetja duket se është njohëse shumë e mirë e gjuhës angleze, ndaj dhe pengesa që pati në të menduarin në gjuhë të huaj është mëse e mirëkuptueshme. Në një video të gazetës Washington Times, tregohet Presidentja Jahjaga që nuk gjen në anglisht fjalët dhe pyet stafin e vet, se si i thonë “marrëveshjes mes dy shtetesh në anglisht”.

Duket sikur Parlamenti grek ka përherë në axhendë  një pikë për Shqipërinë. Së fundmi, deputetët e forcave politike ekstreme, përfshi dhe ata të LAOS-it, kanë kërkuar sqarime nga qeveria greke dhe ministria e Jashtme e saj në lidhje me regjistrimin e popullsisë në Shqipëri. Në interpelancë Ministria e Jashtme greke me anë të një raporti të gjatë drejtuar parlamentit ka theksuar se i ka ndjekur nga afër gjithë procedurat e regjistrimit dhe ka ndërhyrë në kohë “për mbrojtjen e integritetit të procesit”.

Ky vit që po mbyllet shënon vitin e 14-të që, sipas shifrave zyrtare, mbyllet me rritje ekonomike në Shqipëri. Si është financuar kjo rritje? Studime të FMN-së dhe bankës Botërore kanë përmendur shpesh dërgesat e emigrantëve si një burim i rëndësishëm financimi për rritjen ekonomike shqiptare. Por shifrat zyrtare të rritjes vjetore të borxhit publik tregojnë se edhe ky i fundit ka qenë një burim po aq i rëndësishëm i financimit të rritjes ekonomike në Shqipëri.

Moderatori i ‘Opinionit’, Blendi Fevziu, ka promovuar në Galerinë e Arteve, atje ku tani mban pritjet ambasada amerikane për 4 korrikun, Ditën e Pavarësisë, librin e tij “Enver Hoxha-një biografi’. Kanë qenë të gjithë: ambasadori amerikan Arvizu (jo se i pëlqen aq shumë Galeria, por për Fevziun kësaj radhe), diplomatë të tjerë të huaj që nga Sequi e me radhë e deri te krerët e shtetit, përjashto këtu presidentin Topi. Ka munguar edhe kreu i Partisë Socialiste Edi Rama, por ka qenë ish-kreu i saj Fatos Nano që ABC News e quan politikani Fatos Nano. Është shfaqur edhe Kastriot Islami.

Pas vizitës së sotme në Kosovë të kancelares Merkel, Kryeministri i Kosovës Hashim Thaçi u nis papritur për një takim urgjent me Kryeministrin e Shqipërisë, Z Sali Berisha. Arsyeja se Thaçi do të ishte pjesëmarrës në promovimin e librit të Fevziut “Enver Hoxha” duket më shumë si gjetje sesa si arsye e vërtetë. Pritja e ngrohtë e rezervuar për Merkelin, e cila u justifikua me mbështetjen e kancelares për veprimet e fundit në veri të Kosovës nga forcat e Eulex-it, ku më aktivet ishin ato gjermane, duket se nuk mban shumë erë vërtetësi.

Disa agjenci lajmesh kanë shpërndarë njoftimin, se policët janë të indinjuar (të vetmit los indignados në Shqipëri?), pasi qeveria ka marrë vendimin për t’mos u dhënë shpërblime në fund të vitit. Nuk para është dëgjuar që policët shqiptarë të protestojnë kundër qeverisë, pasi përgjithësisht policët janë ish-militantë partie, rrjedhimisht kanë një feeling të dukshëm me qeveritë.

MAPO e sotshme përcjell një alarm, të disatin në radhë, të Shoqatës së Ndërtuesve. Sipas zv/Presidentit të Shoqatës Kombëtare të Ndërtuesve, Ilir Hebovija, sektori i ndërtimit është në alarm dhe kjo klimë do rëndohet gjatë vitit të ardhshëm. Ai ia mvesh gjendjen e keqe të sektorit të ndërtimit krizës ekonomike, dhe shton se gjatë muajve të fundit shumë kompani ndërtimi kanë falimentuar si pasojë e kësaj krize. Ndër faktorët shoqërues të krizës ai përmend mungesën e blerësve dhe mosdhënien e kredive prej bankave.