Top-i i rikthehet tri ditë më pas intervistës së Arvizu-së …. dhe mesazhi del ‘bombë’

Televizioni Top-channel ‘kap’ tri ditë me vonesë një leitmotif, a nënvizim, të intervistës që ambasadori amerikan i dha Çipës për Shqipin. Është fjala për atë pjesë të intervistës, ku ambasadori flet “për njerëz me të shkuar kriminale që mbajnë poste zyrtare”. Askush nga media nuk u ndal në këtë moment pas publikimit të intervistës; ndoshta ngaqë mesazhi që veçuam me thonjëza pak më sipër ishte i shpërndarë dhe i copëtuar në një paragraf të tërë në intervistën e Arvizusë. Shkurt, ishte një mesazh i paqartë.

Dhe ja, Top-channel i rikthehet intervistës jo vetëm për t’u kapur pas këtij mesazhi, por edhe për ta saktësuar atë. Sipas lajmit të mbrëmshëm të Top-it, ambasadori Arvizu ka thënë se “ne e dimë që ka njerëz me një të shkuar kriminale që kanë lidhje me disa pjesë strategjike në shoqëri, ata janë brenda qeverisë…. Për aq kohë sa këta njerëz [janë] të përfshirë në kriminalitet dhe mbajnë poste zyrtare, ky është një problem.” 

Nga një shfletim i gazetës Shqip, ose nga një konsultim me versionin online të kësaj gazete, rezulton se Arvizu-ja tri ditë më pare ka qenë më pak i qartë se Top-i tri ditë më pas. Ja se ç’thuhet në origjinal: “Ne e dimë që ka njerëz që kanë lidhje kriminale, kështu që ata mund të jenë në pjesë strategjike të shoqërisë…. Për sa kohë ke njerëz të përfshirë në aktivitete kriminale që gjithashtu kanë pozita zyrtare, atëherë mund them që...(një parantezë)”. Në origjinal pra, së pari mungon fraza “ata janë brenda qeverisë”, dhe së dyti ambasadori e lë të pambyllur arsyetimin.

Por e mbylli Top-channel-i mbrëmë. Gjasat janë që të ketë qenë dëshira e ambasadorit për ta bërë këtë saktësim. And it’s good që e ka pasur merak këtë gjë.

M.N.