Përfundon në farsë gjyqi ndaj ushtarakëve racistë në Greqi

Me vetëm 3 muaj e 15 ditë burg ka dënuar Gjykata Ushtarake e Pireut vetëm 2 prej 39 marinsave të një toge të Marinës Ushtarake Greke, të akuzuar se kanë shkelur nenin 2 të Ligjit Anti-Racizëm, pasi kanë hedhur thirrje raciste ne paradën e festës kombëtare te 25 Marsit të vitit të kaluar. 37 të tjerët janë shpallur të pafajshëm. Dy prej personave që kishin hartuar akt-akuzën, avokati i palës akuzuese dhe përfaqësuesi i Komitetit të Helsinkit në Greqi nuk janë shfaqur ne gjykatë, pasi kanë deklaruar se janë kërcënuar në seancën e mëparshme, e cila është ndërprerë për arsye të klimës së dhunës që mbizotëroi në sallë, nga pjesëtarë të grupeve ultranacionaliste.

Gjithashtu dëshmitari kryesor i akuzës, gazetari që ka xhiruar videon në fjalë është shfaqur me vonesë dhe nën masa të rrepta sigurie. Çështja në fjalë shkaktoi reagime të bujshme të opinionit publik në Greqi pas publikimit të kësaj videoje nga gazeta "Eleftherotipia", ku marinsat greke bërtisnin ne kor: Grek lindesh,nuk bëhesh kurrë/gjakun tënd do të derdhim, more derr shqiptar.

Mediat vendase që mbështesin partitë e majta, komentojnë se ky fakt vërteton edhe njëherë se në radhët e ushtrisë, forcave të marinës ushtarake dhe të policisë, kanë hapësirë elemente fashiste me pikëpamje dhe ideologji raciste.

A.K.