Hail Hitch: Të vdekshmit të përshëndesin!

Gazetat shqiptare nuk e njohin rubrikën e nekrologjisë, atë që shtypi i shkruar anglo-sakson e ka tipar të përhershëm. Edhe e rënda, e djathta, aristokratja dhe e thella ‘The Economist’ ka, në çdo numër të saj, nekrologjinë e javës (obituary). Nuk dihet se për ç’arsye, apo është vetëm rastësi, por shkrimet më të mira janë pikërisht nekrologjitë. Sigurisht nuk janë gjëra të shkruara me nxitim: autori i shkrimit e njeh personazhin ose e admiron atë. Arrin ta bëjë këtë edhe kur nuk është dakord me mendimet e tij apo të saj. Një rast i tillë është ai i intelektualit dhe publicistit Christopher Hitchens që ndërroi jetë para pak ditësh. Ishte i majtë, ateist, kontroversial. Gazetat, revistat dhe uebsajtet që shkruanin për të ishin të panumërta. Për të kuptuar vendin e C. Hitchens në histori ja edhe një listë e atyre që kanë shkruar për të. (Disa prej tyre si Slate ka 8 shkrime për jetën dhe vdekjen e tij): The New Yorker, The nation, n+1 magazine, Washington Post, The Chronicle of Higher Education, The Daily Beast, The Independent, Tablet Magazine, Newsweek, The New York Times, BNReview, Counterpunch, The Globe and Mail, PJMedia, The Telegraph, Slate, NYMagazine, Reason.com, New Statesman, Los Angeles Times, Commentary Magazine, The Guardian, FrumForum.com, Daily Mail, The New Republic, Financial Times, The Weekly Standard, The Atlantic, Vanity Fair, Irish Times etj. Edhe emrat e autorëve janë po kaq ilustrues. Ndër ta Christopher Buckley, Anne Applebaum, Timothy Garton Ash, Ian McEwan, Richard Dawkins, Kathleen Parker dhe Simon Schama.

H.B.