E gjithë dynjaja në promovimin e librit të Blendi Fevziut

Moderatori i ‘Opinionit’, Blendi Fevziu, ka promovuar në Galerinë e Arteve, atje ku tani mban pritjet ambasada amerikane për 4 korrikun, Ditën e Pavarësisë, librin e tij “Enver Hoxha-një biografi’. Kanë qenë të gjithë: ambasadori amerikan Arvizu (jo se i pëlqen aq shumë Galeria, por për Fevziun kësaj radhe), diplomatë të tjerë të huaj që nga Sequi e me radhë e deri te krerët e shtetit, përjashto këtu presidentin Topi. Ka munguar edhe kreu i Partisë Socialiste Edi Rama, por ka qenë ish-kreu i saj Fatos Nano që ABC News e quan politikani Fatos Nano. Është shfaqur edhe Kastriot Islami. Sigurisht edhe kryeministri Berisha, i cili ka vazhduar ta trumpetojë rëndësinë e librit për Enver Hoxhën e ta quajë ‘vepër’. ABC News-i e ka transmetuar live eventin dhe gazetari Drini Zeqo u ka zënë pritë të gjithëve për t’u marrë ndonjë intervistë. Ardian Fullani i tha ‘jo’, por asnjë tjetër për be. Nga të pyeturit pak e kishin lexuar librin. Inva Mula nuk kish patur kohë për shkak të angazhimeve, ndërsa Luan Hajdaraga kish patur kohë vetëm për gjysmën e faqeve. Mikrofoni është ndalur edhe para gojës së stilistit Joni Peçi, i cili ka thënë se njeriu i veshur më bukur këtë mbrëmje ishte…Fevziu. Ka shtuar se kish pikasur edhe kostume ‘Armani’ në sallë. Fevziu mbajti një fjalim, të cilin e hapi dhe mbylli me citate të Vaclav Havelit. Nuk kanë munguar as ata, dhe nuk kanë qenë të paktë, që kanë përtypur çamçakëz gjatë gjithë kohës. Kush pyet për mbrëmje galá. Asnjë incident nuk është shënuar për sa kohë askush nuk u kap duke ngrënë fara.

P.S. Ky lajm ka ardhur nga një lexues (duhet të ketë qenë atje; ose duhet të jetë informuar në detaje nga dikush tjetër), që kërkon të mbetet anonim. Nuk kuptohet mirë se ç’ka këtu për të kërkuar anonimat. Redaksia ka ndërhyrë për ndonjë ndreqje të natyrës ortografike; jo për gjë tjetër.