Vdiq dje Christopher Hitchens, intelektual brilant i kohës së sotme

Dje, pas një sëmundjeje të rëndë, me të cilën bashkëjetoi më shumë se një vit, vdiq në moshën 62 vjeçare Christopher Hitchens, një nga protagonistët më të zhurmshëm të kulturës botërore. Në Shqipëri nuk njihet, nuk i është përkthyer asnjë libër, nuk ka mbërritur asnjë jehonë e bëmave të tij, por prapëseprapë ky homazh postum, i shkruar vetëm një ditë pas vdekjes, nuk është snob e i tepërt. Nuk do duhej të ishte kështu.

Kush ishte Christopher Hitchens? Ishte një intelektual brilant, provokativ, e një mendje e rrallë kritike që kish një qëndrim për pothuaj çdo gjë. Ish i majtë 24 karatësh, që mbështeti luftën e SHBA-ve e të Britanisë së Madhe në Irak, ishte britanik që ish kundër monarkisë, ish plot kompasion për të varfërit, por e qortonte në vijimësi Nënë Terezën, të cilën nuk e quante mike të të varfërve, por mike të varfërisë, dhe për të cilën mendonte se shenjtëronte vuajtjen dhe ngrihej kundër emancipimit të gruas, e njihnin si a-teist, por vetmbahej si anti-teist, i përshkruante fetë e organizuara si burime të urrejtjes e të tiranisë në këtë botë, mendonte se besimi në fe është kapitullimi i mendjes, i arsyes, dmth i së vetmes gjë që na bën të ndryshëm nga kafshët, udhëhiqte fushatat kundër fashizmit islamik, etj, etj.

Mbeti deri në fund intelektualisht i ndershëm. Pasi u diagnostikua me kancer, refuzoi sugjerimet dhe idenë e një “flirti” të sekondës së fundit me Zotin, si një mundësi për ca paqe në botën e përtejme. Mbeti a-teist. Më saktë anti-teist. Urdhëri i Misionareve indiane të Bamirësisë që ka lënë trashëgim Nënë Tereza lëshoi një deklaratë, ku thuhej se do të luteshin për shpirtin e tij, pavarësisht sulmeve të egra që ai ka bërë në adresë të Nënë Terezës.

Re.Pu.