Kur media gënjen ditën me diell

Në lajmin e datës 14 dhjetor 2011, në disa media elektronike dhe print u tha: ”Rajoni i Lombardisë në Itali i ka akorduar për këtë vit “Çmimin e Paqes 2011”, presidentes së fondacionit “Fëmijët shqiptarë”, zonjës Liri Berisha” si dhe se “Çmimi iu dorëzua zv.Ministrit të Shëndetësisë, Bardh Spahia, dhe konsulles sonë në Milano, Nausika Spahia, në një ceremoni tradicionale të përvitshme, nga Presidenti i Rajonit të Lombardisë, Roberto Formigoni”.
Në të vërtetë, çmimi për paqen 2011, iu dha Cesare Casnedi-t, nga komuniteti i të verbërve, si çues përpara i shpresës për të verbërit në Afrikë, spitalit të paqes Mtendre në Zambia nën administrimin e Dioqezës së Milanos, dhe mjekut palestinez Abduelaish Izzeldin, si mediator i rëndësishëm i dialogut ndërmjet palestinezëve dhe izrealitëve. Çmim special iu dha orkestrës Pequeñas Huellas, shoqatë kjo jo fitimprurëse, me qendër në Havana (Kubë), qëllimi i së cilës është bashkimi i të rinjve të moshës 8-17, nga çdo kontinent, nëpërmjet muzikës. Shoqata ka dhënë shfaqje në shumë vende të botës duke përçuar në këtë kuptim, mesazhin e paqes, vëllazërisë dhe duke i dhënë zë të drejtës për një fëmijëri të shëndetshme.

Kurse zonjës Berisha, iu shpreh mirënjohje për punën e kryer si pediatre, e impenjuar në mënyrë të vazhdueshme në fushën sociale, shkencore dhe atë të shkencave humane.( http://www.ilgiorno.it/lecco/cronaca/2011/12/13/636833-premi_pace_giornata_festa_milano.shtml)

A.K