“Makthi” i Metës shtyhet dhe 20 ditë

Të gjithë ata që janë të interesuar në mënyrë të veçantë mbi fundin e gjyqit që ka për të pandehur ish-zv.kryeministrin Ilir Meta, do duhet të presin datën 6 janar. Gjykata e Lartë ka vendosur sot që vendimin përfundimtar ta japë pas festave të fundvitit, dhe me këtë ka zgjatur makthin e Metës edhe një vit (në fakt, fiks edhe 20 ditë).

Ka makth Meta? Në pamje të parë duket sikur i kopsitur gjërat, dhe sikur gjykatën e ka në dorë, por makthi nuk ka të bëjë vetëm me vendimin; ka të bëjë me këtë sagë (për të) që, përpara se të jetë penale, është mediatike, dhe si e tillë e ka paralizuar, ose e ka shoqëruar si gjyle e lidhur te këmbët, në veprimtarinë politike. Ai ka kohë që po luan me profil të ulët, dhe vendin e ka pasur nëpër margjinat e medias.

Por dhe një lloj makthi të natyrës juridike ka arsye ta ketë. Gjykata e Lartë ka vendosur të pranojë si prova laptopin e Priftit, orën kamera me të cilën janë bërë dhe regjistrimet, si dhe USB-në. Avokatët e Metës nuk kanë dalë shumë të kënaqur nga salla e gjyqit, e ndoshta janë duke menduar se kësaj gjykate nuk është për t’i zënë besë në rrethanat e një presioni mediatik e ndërkombëtar.

Re.Pu.