Berisha apo Kashei i pavdekshëm

Kryeministri e ka hapur mbledhjen sotme të qeverisë me një sqarim në lidhje me ngjarjen e datës 12 dhjetor, kur gjatë ceremonisë së 21-vjetorit të themelimit të PD-së ai pati një përkeqësim të menjëhershëm të gjendjes shëndetësore, çka e detyroi të ndërpriste fjalën e tij dhe të dërgohej në spital nga truprojat.

Sipas Berishës, gjithçka ka qenë në kuadrin e një viroze, e cila mund të krijojë episode të tilla në organizmat që reagojnë fuqishëm.

“Cili është shpjegimi? Hiperenergjia! Në tërësi këto viroza japin temperatura të larta etj. Por në një organizëm që reagon fuqishëm, krijohen episode të tilla të cilat kanë ardhur në ridimensionim dhe zvogëlim. Pra ndihem shumë mirë”, ka theksuar Berisha, duke u ndalur më tej në falenderimet ndaj mjekëve që e kanë trajtuar, por pa përmendur më emer spitalin ku është kuruar.

Duke mbajtur lart “moralin e militantëve”, Berisha gjeti rastin të bënte publik sekretin e tij. “Nga një chek up që u bë rezultoi se në sistemin e të gjitha enëve të qarkullimit të gjakut të Sali Berishës nuk gjendet qoftë edhe një pllakë e vetme arteroslerotike. Kjo do të thotë sistem që nuk ka moshë”.

Lajm i keq për Emin Gjanën që shpresonte që t’i zinte vendin në një kohë më të shkurtër.

Andi Kananaj