Samaras kërkon me ngulm detin. Berisha: “Prishur mos qoftë!”

Sipas Balkanweb-it, që citon mediat elektronike greke, gjatë Kongresit të Partive Popullore Europiane, kryeministri i Shqipërisë, Sali Berisha, zhvilloi një takim me Antonis Samaras, kreun e “Demokracia e Re”, partia e djathtë greke në opozitë. Samaras i propozoi kryeministrit Berisha që dy vendet të shqyrtojnë përsëri marrëveshjen për përcaktimin e kufijve të zonave detare dhe të shelfit kontinental midis tyre, propozim që u përshëndet nga Berisha. Të dy ranë dakord të përfundojnë një marrëveshje të re mes tyre, kur opozita e djathtë të vijë në pushtet dhe kreu i saj, Samaras, të bëhet kryeministër.

Duke e ditur se sa e do kryeministri jonë detin, gjasat janë që ai e ka kënaqur Samarasin me “lugë bosh” dhe nuk beson se e djathta greke do të vijë ndonjëherë në pushtet. Përndryshe, ngushtimi i hapësirës detare shqiptare mund ta gjejë gabimisht kryeministrin duke notuar në ujëra greke gjatë pushimeve të tij të verës. Nga ana tjetër, ngulmi i grekëve për të kërkuar një det që nuk është i tyri, pikërisht kur po u kërkohet të shesin dhe ishujt për të dalë nga kriza, tregon se e ardhmja ekonomike është në atë (nën)det, e jo në ishujt.

K.C.