Mero Baze futet në mendjen e Gjergj Lezhjes dhe rishkruan skenarin e 21 janarit

Në editorialin e  sotëm, Mero Baze “i qan hallin” Gjergj Lezhjes që është thirrur të dëshmojë në Prokurori e që mund ta pësojë për ngjarjen e 21 janarit. Këtë “të shkretë” e vendos në situatën, që duhet të ballafaqohet me Berishën përpara se të vendosë se ç’duhet të bëjë. Mero i përjashton të gjitha opcionet, por tek njëri sosh i pëlqen të ndalet: “[Ç’të bëjë Gjergji?] Të shkojë në zyrë të tij [të Berishës] e t’i thotë çdo bëjë me atë “laviren” që po na kërkon, nuk guxon se ka frikë se ai xhindoset, përplas disa herë buzët pa asnjë fjalë, merr celularin, e lë prapë mbi tavolinë, merr pultin, ndez televizorin, i ngre zërin, tund kokën, dhe e pyet papritur ‘urdhëro…!’, sikur nuk ka dëgjuar asgjë nga halli i tij.” Duhet besuar kjo mise en scéne, pasi Mero ia di përmendësh çdo tic, çdo grimasë e çdo belbëzimë parazitare Berishës. Jo më kot vijon ta zhvillojë e plotësojë ngjarjen e hamendësuar në zyrën e tij: “Pastaj ai [Berisha] do ta ulë (Gjergjin) sikur s’ka ndodhur gjë, dhe do t’i mbajë një fjalim të gjatë me fakte që i di vetëm ai se ajo Ina Rama, ai horri Bamir Topi dhe ca çakaj të tjerë kanë dashur ta vrasin më 21 janar atë dhe mbesat… ‘Po, po, e kam të sigurt, ma pranoi dhe Kantrimeni në bisedë, ma tha një njeri që i ka regjistruar të gjitha, po mos ja thuaj njeriut.”

Në fund, Mero rishkruan script-in e mundshëm të filmit horror të 21 janarit, dhe këtë e bën duke u vendosur në lëkurën e Gjergj Lezhjes: “Gjergji del jashtë në korridor, mban flet-thirrjen e prokurorisë në dorë, kujton 21 janarin, ulërimat e Atij për të hapur zjarr, hezitimin e Ndreut, grushtin e badigardit të Berishës mbi syrin e tij, nxirjen e syrit, marrjen nga brezi të pistoletës dhe hapjen zjarr mbi turmë nga kryebadigardi, ulërimat, fytyrën e zverdhur të Lul Bashës që i dridhej buza dhe thoshte ‘çfarë bëhet, çfarë bëhet’, paramilitarët që prisnin tek oborri i Ministrisë së Bodes, pastaj takimin mbasdite për prishjen e provave, ndarjen e detyrave për të hedhur pistat e reja, versionin që Olldashi të fliste për një Benz me 40 kg tritol, versionin që Ben Imami të fliste për pistoleta që janë përdorur nga socialistët për të vrarë njëri- tjetrin, pastaj skenari i thikave helmuese, çadrave- pistoletë, helmit nga gjarpërinj të jugut (Pse të jugut xhanëm se dhe të veriut të helmojnë), dhe gjithë çfarë kish ndodh në atë ditë.” 

Re.Pu.