Harasani shpiegon “planet e tjera”

Andis Harasani shpiegoi mbrëmë në emisionin “Arena” të Roland Qafokut në Planet TV se përse nuk e kishte pranuar propozimin e Edi Ramës për të drejtuar Grupin e Punës për Energjinë.  Para disa ditësh ai kishte shkruar në Facebook se nuk e pranonte ata post ngaqë kishte plane të tjera.

Së pari, Harasani tha se Rama nuk ishte konsultuar me të para se ta emëronte në drejtim të Grupit të Punës për Energjinë dhe se ishte kundër idesë që të bëhet një draft program e më pas të detajohet ai për çdo sektor. Së dyti, ai i dha përgjigje pyetjes interesante rreth “planeve të tjera”.

Harasani tha se ajo që është quajtur në media “Lëvizja e Mendimit Ndryshe”, e që përfshin përveç tij edhe Kastriot Islamin, Musa Ulqinin, Edlira Haxhiymerin etj., do të vazhdojë të ushtrojë trysni pozitive brenda PS-së dhe, në qoftë se do t’i mbyllet çdo derë, do të krijojë një parti tjetër të majtë. Kur u pyet në se kjo parti “do të çonte ujë në mullirin e Berishës”, ai tha se ajo do të luftonte për ardhjen e së majtës në pushtet, duke qenë në koalicion me PS-në dhe partitë e tjera të majta. Por kur unë, që isha pjesë e panelit të gazetarëve, bëra hamendjen se kjo parti, po të mos bëjë koalicion me PS-në, do të marrë aq vota sa ç’mori PSV-91-shi i Petro Koçit (rreth 1%), ai këmbënguli se kjo parti kish marrë më shumë vota se aq. Kjo mbrojtje më la të kuptoj se plani i vërtetë i tij dhe i kolegëve të vet është pikërisht krijimi i një partie që synon t’i heqë së majtës një sasi sa më të madhe votash.

E.Zaloshnja