Të parkosh në Tiranë, më shtrenjtë për festat

Titulli nuk shpreh një të vërtetë absolute. Të parkosh në një prej rrugëve të kryqytetit, në Bulevard ose te Stadiumi Kombëtar ‘Qemal Stafa’ për shembull, është më shtrenjtë, por kjo nuk ka lidhje me festat. Zakonisht një orë kushton 100 lekë të rinj, e për çdo 60 minutësh vijues duhet të shtosh edhe një qindshe tjetër, e kështu me radhë. Sot nëse kishe një punë të shpejtë diku e doje ta shfrytëzoje hapësirën e dizajnuar nga Bashkia si parkim me pagesë për nja çerek a gjysmë ore, duhet të paguaje 200 lekë të reja. Kjo sepse biletashitësit, të cilët shkëlqejnë me xhaketat portokalli të ndezur në kioskat e vogla e të bardha, të thonë se kanë vetëm bileta 200 lekëshe. Të shpjegojnë se nuk është faji i tyre, por derisa të marrin kolitë me bileta 100-she të cilat nuk ua ka sjellë Bashkia, ata do vazhdojnë t’u kërkojnë qytetarëve të paguajnë për kohë dhe hapësirë që nuk e shfrytëzojnë. Të japin edhe një zgjidhje tjetër: lëre pa biletë duke marrë në sy rrezikun e një gjobe prej 7 mijë lekësh të reja, nëse ta marrin makinën me karrotrec.

H.B.