Optimizmi i kryeministrit çudit komentatorët politikë

Berisha e mbylli vitin ashtu si pritej e si është në stilin e tij, dmth me deklarata hiperbolike të llojit “jemi më mirë se disa vende të Europës, ky ka qenë viti më i mirë për shqiptarët, etj, etj”. Ka reaguar menjëherë opozita, por edhe do opinionistë. Afrim Krasniqi bën vëzhgimin, sipas të cilit Merkel, Cameron, Obama, etj, flasin për vështirësi, ndërsa kryeministri ynë flet për arritje historike. Në një kohë që, thotë Krasniqi, “këtë vit u penalizuam me refuzimin e ftesës për në BE, fjala investim u zëvendësua nga fjala kursim, ndodhën 22 atentate publike ndaj biznesmenëve e gjyqtarëve, janë grabitur në nëntë raste bankat, e së fundmi dhe një makinë e ministrit, u shënua viktima e 13 në minierën varr të Bulqizës, asnjë zyrtar nuk përfundoi në pranga [megjithë korrupsionin e denoncuar nga të gjithë]”, etj, etj.

Një vëzhgim të tillë e bën dhe Henry Çili, i cili e quan diskursin e kryeministrit ‘të papërshtatshëm’, pasi gjendja e sotme “është më e pakta problematike ose me probleme në përparim, ekononomia është në vështirësi e këtë askush nuk e vë më në dyshim”, etj. Është shkrimi i dytë radhazi i Çilit, që ka formën e një kritike në adresë të kryeministrit. Kanë qenë kritika soft, por kanë qenë kritika.

Re.Pu.