Ministres italiane nuk i bën goja të thotë fjalën ‘sakrificë; dhe ia kris të qarit

Ajo që ndodhi dje në konferencën për shtypin të kryeministrit italian Mario Monti dhe të ministres së Punës e të Asistencës Sociale, Elsa Fornero, tingëlloi si një mise-en-scène e stilit hollywood-ian e kopsitur qysh më parë. Por afërmendsh, asgjë s’ka qenë e kopsitur. Përkundrazi, gjëja ishte e një natyraliteti goditës: “Ministrja Fornero, rreth të pesëdhjetave, ekonomiste e njohur në botën akademike e universitare italiane, merr fjalën për të shpjeguar reformën e pensioneve; fillon të flasë me një ton të qetë, neutral, të ftohtë, tamam teknokrate, mirëpo kur vjen puna që duhet të shqiptojë fjalën ‘sakrificë’, ajo ndalet, merr frymë, papritur e kap ngashërimi, bën grimasën e dikujt që është gati t’ia plasë të qarit, duket sikur i mban lotët, por jo ngashërimin, bllokohet, dhe boss-i i saj që është aty pranë, në të majtë, fillimisht kapet në gafil, pastaj ftillohet, u thotë gazetarëve që fjala që donte të thosh është ‘sakrificë’, dhe pasi i kërkon leje vartëses së vet e pasi merr miratimin prej saj me tundje kryesh, zë të shpjegojë çfarë ministrja s’mundi ta shpjegojë, dmth sakrificat e mëdha që do t’u duhet të bëjnë gjithë italianëve. Ministrja u ndje disi e lehtësuar. Kushedi ç’ka menduar në ato momente. Ndoshta ka pyetur veten: Pse duhet ta kem unë për hise këtë mandatë për italianët? Pse jo ata që e kanë për zanat këtë punë, dmth politikanët?

Reagimet në shtypin Italian kanë qenë nga më të ndryshmet. Por më i bukuri erdhi në formën e një sondazhi: Ju kapi ngashërimi dhe juve, apo përkundrazi, ju kapi irritimi prej kësaj skene?

M.N.