Kush e ka ftuar Fatos Nanon në London School of Economics?

Të gjitha media-t kanë informuar lidhur me një intervistë të Fatos Nanos dhënë Top-channel-it nga një prej qendrave të mendimit akademik të botës, nga London School of Economics, dhe kanë përcjellë mesazhin e tij kryesor, atë që “unë jam këtu, në pritje që t’më kërkojnë të bëhem President i Republikës”. E gjatë intervistës, madje qysh në krye, ia kish qejfi të nënvizonte se “ish në Londër me ftesë të Institutit Evropian të Shkollës Ekonomike të Londrës (London School of Economics, LSE) për të folur për Shqipërinë, për të paraqitur vendin e tij.”

Ai mund ta jepte në Shqipëri këtë intervistë. Mund ta jepte në cilin televizion të donte. Mund ta jepte nga cili qytet që donte. Mund ta jepte kur të donte. Mirëpo ai ka preferuar ta japë në London School of Economics, dhe me siguri ka dashur të përcjellë idenë se ai nuk është një vulëhumbur. Përkundrazi, kërkohet gjithandej. Madje, kërkohet dhe nga London School of Economics.

Po kush e ka kërkuar atje? Ai thotë se ka qenë “European Institute”, një ‘shkollë’ brenda kësaj shkolle që është e fokusuar në punët e Europës, dhe synimi ka qenë që të informoheshin mbi Shqipërinë nga një zë autoritar. Është e vërtetë? Ndoshta, pse jo? Vetëm se aktiviteti duhet të ketë qenë krejt pa rëndësi. Po të futesh në site-in e Shkollës Ekonomike të Londrës (www.lse.ac.uk), e të bësh një search të emrit Fatos Nano, përgjigjja është: “0 search results for Fatos Nano”.

M.N.