Dy masa masa mbrojtëse të Berishës ndaj një rrjedhjeje të votave të djathta

Muajt e fundit Berisha ka sulmuar fort si “faqezinjtë” e Kreshnik Spahiut ashtu dhe “horrat e bulevardit” të Bamir Topit. Lëvizja e të parit dhe krijimi i mundshëm i një partie nga i dyti duket se i kanë futur frikën se mund të ketë një rrjedhje të votave të djathta në zgjedhjet e ardhshme parlamentare. Sot Berisha ka bërë dy deklarata që duken si masa mbrojtëse ndaj një rrjedhjeje të tillë.

Në territorin patriotik, ku ka luajtur fort AKZ-ja, Berisha është kundërpërgjigjur nga mbledhja e Komitetit për 100 Vjetorin e Pavarësisë. “Flamuari kuqezi është  flamuri më i bukur i botës dhe është interesante se ne edhe ditën e pavarësisë e quajmë të flamurit, edhe hymnin e kombit e kemi të flamurit. Duhet të bëjmë gjithçka që ky flamur në 100 vjetorin e pavarësisë të valëvitet në çdo ballkon shqiptarësh në Shqipëri dhe botë” – tha ai. Më tej ai shtoi: “Zotërinj ministra, është e rëndësishme që ne të mbështesim fort institucionet tona kërkimore në përpjekjen e tyre për një shqyrtim të ndershëm serioz të një shekulli ‘Shqipëri e pavarur’. Nuk mund të thuhet se qëndrimet e njëanshme në histori nuk kanë ndikuar në qëndrime të njëanshme në tërësi, kështu që është e domosdoshme të ridimensionohen figurat kryesore të këtyre 100 vjetëve të pavarësisë së vendit. Besoj se disa prej tyre, si Ismail Qemali, Ahmet Zogu, Hasan Prishtina, duhet të kenë praninë e tyre në kryeqytet. Pavarësia vërtet u shpall në Vlorë, por objekte për nderimin e saj duhet të ketë edhe në Tiranë.”

Si kundërpërgjigje ndaj partisë së “horrave të bulevardit”, Berisha ka dhënë një sinjal armëpushimi; i ka hapur rrugën miratimit të kandidaturës së Bujar Leskajt për kreun e Kontrollit të Lartë të Shtetit. Gazeta Tema raporton, se Berisha ka thënë gjatë mbledhjes së qeverisë, se Leskaj “nuk është kandidatura jonë, por ne do e votojmë atë, për të mos shkaktuar një boshllëk”. Ndërsa gazeta Panorama raporton se vendimi është komunikuar sot në mbledhjen e grupit parlamentar nga vetë kreu i PD-së, pa praninë e medias. Me herët, maxhoranca rrëzoi kandidaturën e Topit për Sali Shehun në krye të KLSH-së, duke e cilësuar të papërshtatshëm.

E.Zaloshnja