Bode apo INSTAT? Rritje ekonomike e shëndetshme apo anemike?

Pasi Berisha bëri bilancin e sukseseve të këtij viti për Shqipërinë, Ministri i Financave Bode, deklaroi para tri ditëve se vlerësohet që rritja reale e Produktit të Brendshëm Bruto ishte 3.9% për vitin 2011. Ky vlerësim, tha Bode, bazohet në informacionet që disponon Ministria e Financave. Dhe në qoftë se ai është i saktë, mund të thuhet me plot gojë se kemi patur një rritje të shëndetshme ekonomike, në kushtet kur vendet përreth janë në një krizë të thellë ekonomike. Bode na siguroi, në fakt, se “rritjen prej 3,9% e konfirmon dhe INSTAT-i”

Por ç’thotë INSTAT-i? Dje, më së fundi, INSTAT-i raportoi shifrën e Produktit të Brendshëm Bruto (PBB) për tremujorin e dytë të vitit 2011 dhe ajo na tregonte se PBB-ja ishte ulur 1.7% në krahasim me tremujorin e parë dhe rritur vetëm 0.5% në krahasim me tremujorin e dytë të vitit 2010. Po të kombinojmë këto shifra me ato të tremujorit të parë, rezulton se në gjysmën e parë të këtij viti rritja ekonomike ka qenë vetëm 2.1%. Që rritja për gjithë vitin të ketë qenë 3.9%, siç deklaroi Bode, i bie që në gjysmën e dytë të vitit, rritja ekonomike të ketë qenë 5.7%. Në këtë mënyrë do të balancohej rritja anemike e gjysmës së parë të vitit.

Por a do të raportojë dot INSTAT-i një rritje 5.7% për gjysmën e dytë të vitit 2011? Dielli me shoshë edhe mund të tentohet të mbulohet, por me perde tyli nuk është përpjekur ta mbulojë njeri…

E.Zaloshnja