Në pritje të vendimit për statusin, Austria: Iu mbështesim pa kushte.

Austria edhe një herë ka dhënë mbështetjen për Shqipërinë në rrugën drejt Bashkimit Europian. Në një takim me kryeministrin Edi Rama, shefi i diplomacisë austriake dhe ministri i Drejtësisë të Austrisë theksuan se qëllimi i kësaj vizite ishte shprehja e mbështetjes që Austria i jep Shqipërisë dhe statusit të saj të vendit kandidat në Bashkimin Europian.

Ndërkohë kryeministri Rama i falenderoi për mbështetjen e vazhdueshme të Austrisë, si dhe për nismën për t’ju drejtuar me një letër BE-së për të mbështetur statusin kandidat për Shqipërinë. Në takim u ndanë mendime rreth qasjes europiane ndaj rajonit të Ballkanit Perëndimor.

Kryeministri Rama rikonfirmoi pikëpamjen se është pikërisht aspirata europiane e të gjitha vendeve të rajonit që bëri që ky të jetë viti i parë në paqe. Një tjetër pikë ishte dhe rritja e bashkëpunimit dypalësh dhe për reformën në sistemin e drejtësisë. Kryeministri, nënvizoi se Qeveria është e vendosur në këtë sfidë jetike për shoqërinë shqiptare. Nga ana tjetër ministri i Drejtësisë Brandstetter ofroi mbështetjen e Austrisë, në të gjitha përpjekjet e Qeverisë për reformimin e sistemit të drejtësisë.