Miratimi e publikimi i një abetareje të përbashkët për Shqipërinë e Kosovën është shndërruar në një festë të shpifur propagandistike. Berisha ka vrapuar dhe e ka mbajtur frymën në Prizren, ku është organizuar ‘qoka’. Atje është takuar me dinjitarët e lartë të Kosovës, mes të cilëve Thaçin, dhe ia kanë nisur harbimit, ku binin në sy fjalime të ndërkryerish. Thaçi tha se “sot është një arritje historike, pasi në vitin jubilar të 100-vjetorit të pavarësisë po promovohet abetarja e përbashkët. Kjo është abetare e lirisë, është abetare e Kosovës dhe Shqipërisë europiane”. Ju duken tone shumë patetike? Jo dhe aq krahasuar me Berishën, që tha se “[kjo abetare e përbashkët] mbart sakrificat e shqiptarëve që nga koha e Skënderbeut deri në luftërat në Kosovë e Maqedoni. Ajo bart idealin e lirisë së shqiptarëve, idealin e bashkimit të tyre si idealin e përjetësisë kombëtare.  Nuk duhet të harroni kurrë se kjo abetare ka me qindra jetë të flijuara. Abetarja është margaritari i kurorës së 100-vjetorit të Shqipërisë së pavarur.”

Përballë këtyre pompave, Kongresi i Manastirit, apo dhe vetë Lidhja e Prizrenit, të duken si çikërrima historike.

M. Nano

PS-ja, saktësisht Edi Rama, foli për presionet korruptive të maxhorancës të bërë mbi dy deputetë të saj me synimin për t’u blerë votën presidenciale. Denoncimi ish, në fakt, kuturu, krejt i padokumentuar dhe i paprovueshëm, pa emra të njerëzve nën presion apo të njerëzve që kanë bërë presion, e në këtë kuptim e gjithë kjo nuk la shije të mirë.

Nuk u mor vesh pse në këtë histori erdhi një reagim nga Hazir Gashi, deputet i PS-së. Duhet t’i jetë përmendur emri si deputet nën presion korruptiv në ndonjë gazetë; ndryshe, nuk ka se si shpjegohet reagimi i tij. “Kjo është një gënjeshtër e madhe”, tha ai. Pritej në këto rrethana që, si provë luajaliteti ndaj partisë, ai të jepte garanci të llojit “vota ime nuk do të hidhet kurrë për kandidatin e Berishës”. Por nuk e dha këtë garanci. Përkundrazi, tha se “nëse dua t’ia jap votën dikujt, këtë e bëj jo për pará, pasi nuk kam nevojë për pará. Jam aq burrë sa t’i them partisë që po, filan fistekun dua ta votoj për President”.

Re.Pu.

"Familja ime ka transferuar nja 20 mijë euro në numrat e llogarisë së motrës që banon në Zvicër”, thotë një grek, që banon në Bruksel e që një pjesë kursimesh i ka në bankat greke (sipas sitit euobserver.com). Kjo punë po shndërrohet në një flamë. Shumë grekë të tjerë po transferojnë paratë e tyre nga bankat greke në banka të huaja, ose po i marrin nga bankat (kur mundin).

 “Edhe sikur tërheqjet apo transferimet të vijojnë me këto ritme, ne mund të mbijetojmë deri në zgjedhjet e qershorit”, thotë një ekonomist që punon në një nga bankat greke. Mirëpo, situata duket se është më dramatike se sa kaq. Është folur vetëm për tërheqjet e bëra të hënën e të martën, të cilët kapin vlerën e 1, 2 miliardë eurove (për ditën e mërkurë nuk jepen të dhëna), por qysh nga zgjedhjet e 6 majit, shuma e nxjerrë apo e transferuar prej bankave greke është 5 miliardë euro. Në një kohë që depozitat në tërësi shkojnë deri në 165 miliardë euro.

Re.Pu.

Biznesmenët që kanë zaptuar përfundimisht gjirin e Kakomes, kanë arritur të fusin në dorë ALUIZNI-n dhe kanë mundur të blejnë tokën brenda territorit të tyre përmes procesit të legalizimit. Kompania Riviera, e cila kishte filluar qysh në vitin 2004 procedurat për të marrë me koncesion Gjirin e Kakomese, së bashku me një kompani franceze, tani rezulton të jetë e vetme pronare e një sipërfaqe toke, të cilën ja ka shitur me firmën e tij ish- kryetari i ALUIZN-it, Shaban Memia.

Dokumenti i gazetës Tema dëshmon se në fillim të muajit mars, ndërsa Memia ka qenë në prag të largimit nga detyra e Drejtorit të Përgjithshëm të ALUIZN-it, ka firmosur shitjen e tokës për llogari të kompanisë Riviera, e cila tashmë vepron në Gjirin e Kakomes si një subjekt pa një status të subjektit turistik. Kompania franceze “Club Med” është tërhequr nga projekti prej vitit 2007 dhe me kuadrin ligjor shqiptar, i bie që koncesioni i dhënë dikur nga Fatos Nano të jetë i pavlefshëm.

Por, duke bërë fakt të kryer praktikën e bllokimit të territorit dhe kthimit të tij në një territor ku arrestohen çdo vite roje për trafik droge, zaptuesit e këtij trualli kanë mundur që dhe të blejnë një pjesë të territorit kundrejt një kontrate e cila është në kundërshtim flagrant me ligjin.

Në bazë të ligjit 8053 të dhjetorit 1995, banorët e zonave bregdetare duhet të kompensohen me tokë ose truaj, në rast se toka e tyre ka objekt ndërtimi prioritet turistike. Toka që i është dhënë kompanisë Riviera prej ALUIZN-it, është tokë e cila ka qenë në përdorim dhe shpërndarë për banorë të zonës, të cilët shpronësohen nga vendimi “de facto” i ALUIZN-it, që ja shet një kompanie e cila e ka ende të paqartë statusin e saj si subjekt turistik.

Ky vendim bëhet edhe më arbitrar ndërkohë që në Kuvend po diskutohet sërish ligji për kalimin në pronësi pa shpërblim të tokës bujqësore për banorët pranë zonave turistike, që shpronësohen për nevoja publike.

Vendimi ka ngjallur reagim në fshatrat Nivicë dhe Shën Vasil, të cilët janë ende të paqartë për fatin e pronave të tyre.

Interpelanca ne Kuvend. Brace denoncon grabitjen e tokes ne bregdet

Opozita akuzon qeverinë se po synon te përvetësoje tokat e 8 mije familjeve ne bregdet, nëpërmjet nismës për titujt e pronësisë. Sipas deputetit Erjon Braçe, abuzimi shtrihet ne 110 milion metra katrore toke, për t’ia kaluar ato një grupi njerëzish. Por ministri i Bujqësisë, Genc Ruli, i cili ishte iniciatori i nismës ligjore, tha se drafti as nuk krijon ndarje te re te tokës dhe as prodhon tituj te ri pronësie. Por një qëndrim kritik me qeverinë, për çështjet e pronës mbajti ministri i Mjedisit, Fatmir Mediu. Ai pohoi se me këto nisma, qeveria thellon antikushtetutshmerine ne raport me pronën. Ne nisje te seancës, kreu i grupit parlamentar socialist, Gramoz Ruçi, debatoi me kryetaren e Kuvendit, Jozefina Topalli, për kërkesat e opozitës për interpelanca me kryeministrin Berisha.

Marrë nga Tema

Pas publikimit të skandali të diplomës së marrë në Universitetin "Kristal" nga Renzo Bossi, prokurorët kanë bërë gjënë minimale të punës së tyre duke filluar verifikimet në këtë universitet. Pjesëmarrja në mësim dhe provime janë tregues minimal që faktojnë që një student ka ndjekur studimet në një universitet. Dukë marrë të mirëqënë këtë, prokurorët kanë kërkuar procesverbalet e provimeve (ku presupozohet që profesorët kanë vendosur notat e provimeve për Bossin), por abracadabra! Në kasafortën e universitetit nuk gjendet asgjë. Shtypi shkruan se nga 39 procesverbale që duhej të ekzistonin, prokurorët nuk ka gjendur asnjë prej tyre.

Universiteti Kristal e justifikon mos gjendjen e dokumenteve me faktin se dy vite pasi studentët mbarojnë ciklin e studimeve asgjësojnë të gjithë procesverbalet e notave!

Re.Pu.

Teatri ynë kombëtar ishte një nga 37 trupat teatrore të ftuara për të marrë pjesë në Festivalin njëjavor ‘Globe to Globe’ e për të luajtur në skenën e Teatrit ‘Globe’ të Londrës (shihni foton) 37 drama të Shakespeare-it në 37 gjuhë të ndryshme. Morëm pjesë me dramën trilogjike Henriku VI, me pjesën e dytë (pjesa e parë e së njëjtës dramë është luajtur nga teatri kombëtar i Beogradit, dhe e treta nga një trupë teatrore e Manastirit të Maqedonisë).

Disa të përditshme tonat informojnë sot mbi një fushatë kryqëzuese që i është bërë trupës shqiptare të përbërë nga aktorë të njohur si Yllka Mujo, Bujar Asqeriu, Kristaq Skrami, Vasjan Lami, Neritan Liçaj, etj, etj. Përmenden komente nëpër blog-je të ndryshme, por në këtë mes duket se ka rëndësi një shkrim i publikuar në the Guardian, në të cilin vlerësohet vetëm një aktor i yni, Bujar Asqeriu. Për aktorët e tjerë, tok me regjinë, nuk ka lëvdata; përkundrazi.

Vetë Bujar Asqeriu është i idesë që shfaqja ishte e shkëlqyer, ndërsa drejtori Kristaq Skrami i konsideron kritikat (veçohet një gazetar serbo-kroat) si “qëndrime tendencioze e politike”.

E.G.

Nora Malaj, zv.ministre e arsimit, në fillim e ka përgënjeshtruar lajmin e publikuar më së pari nga gazeta online Idea mbi dypunësimin e saj, dhe sot i ka dërguar një letër të hapur drejtorit të kësaj gazete, Mentor Kikias. Lajmi mbi dypunësimin e Malajt ish marrë në faqen web të Ministrisë së Arsimit, ku CV-ja e Malajt figuronte e papërditësuar; dhe prandaj, kjo e fundit ka bërë përgënjeshtrimin (figuronte se ish dhe shefe departamenti në Universitetin Kristal).

Ndërsa në letrën e hapur, ajo bën një reagim polemik. Është shumë e pakënaqur nga standardi profesional i ca mediave, që e kanë denoncuar, dhe i kanë kërkuar dorëheqjen, për shkak të një lajmi të pavërtetë. Dhe don që debati të fokusohet në problemet reale të arsimit.

Kikia i përgjigjet menjëherë. Me të njëjtin ton polemik. Kikia e ka pranuar dhe publikuar përgënjeshtrimin e bërë nga Malaj lidhur me dypunësimin, por e largon fajin nga vetja për lajmin e pavërtetë. Dhe më poshtë nënvizon: “Ne do të vazhdojmë të shkruajmë për skandalin ku është zhytur [Universiteti Kristal]  ku ju keni punuar (jo për fajin tuaj), por edhe institucioni ku ju vazhdoni të punoni (kjo edhe për fajin tuaj). Ne disponojmë dëshmi që do t’i publikojmë, të cilat tregojnë sesi në atë shkollë, ku ju keni qenë një nga drejtuesit, studentët janë regjistruar edhe direkt në vitin e dytë apo të tretë, duke paguar paratë në dorë. Ne disponojmë dëshmi se Ministria e Arsimit ka qenë në dijeni të maskaradës që luhej në atë shkollë dhe nuk ka ndërhyrë, madje ka bashkëpunuar duke ia shtrirë filialet e saj në çdo qytet, madje edhe atje ku ka vetëm një shkollë të mesme të bashkuar. Ne po e shikojmë të gjithë publikisht, që edhe pse skandali ka marrë dhenë dhe diplomat e një universiteti shqiptar të licensuar nga qeveria shqiptare, janë bërë gazi i botës, janë bërë një copë letër paçavure me të cilën po tallen tërë mediat e huaja, ministria ku ju mbani një post të rëndësishëm, nuk ka marrë ende asnjë masë.”

Letrën e Malajt dhe reagimin e Kikias (të dyja të plota) mund t’i gjeni në linkun: http://www.gazetaidea.com/2012/05/16/nora-malaj-nuk-punoj-me-tek-kristal-nuk-kisha-korigjuar-cv-ne/

Re.Pu.

Raportuesja për Kosovën në Parlamentin Evropian, Ulrike Lunaçek (është politikane austriake; e meqë jemi në një valë manifestimesh të komunitetit LGBT, është dhe lezbike) ka dhënë një intervistë për Radio Kosovën. Lunaçek njihet për dashamirësinë e saj ndaj kauzës kosovare, dhe prandaj opinionet e saj ndiqen me simpati nga shqiptarët. Këtë herë ajo flet për situatën në veri. “Për mua është e rëndësishme që Qeveria e Kosovës t’ua shtrijë dorën serbëve në veri, mirëpo më e rëndësishmja është që të nisë procesi dhe në këtë mes Beogradi nuk është i nevojshëm. Beogradi nuk ka [pse të ketë] autoritet në veri”, thotë ajo.

Ajo është vendosmërisht kundër idesë së përdorimit të forcës nga ana e qeverisë së Kosovës. “Çdo përdorim i forcës [do mund të prodhonte] një konflikt të ri”, paralajmëron ajo, dhe në fund i jep një mbështetje të drejtëpërdrejtë kryeministrit Thaçi në pakënaqësinë që ky i fundit ka shprehur ndaj BE-së lidhur me liberalizimin e vizave. “Janë disa shtete anëtare, që nuk po tregojnë vullnet që ta përshpejtojnë procesin e liberalizimit të vizave”, thotë ajo duke shfajësuar BE-në si union, e duke drejtuar gishtin tek disa vende të rëndësishme si Franca, Suedia, Belgjika, Hollanda.

Re.Pu.

"Unë dua një parti të bashkuar, të fortë, të gjallë, një parti që di të fokusohet në gjërat që duhen bërë, e jo në larje hesapesh të brendshme; dua një parti që ka projekte qeverisëse, e që di t’u japë përgjigje shqetësimeve të vërteta të njerëzve; dua një parti të hapur për të rinjtë, e të kyçur për të korruptuarit e sharlatanët”. Këto fjalë janë të Roberto Maronit, politikanit që ka shprehur ambicjen ( e që ka të gjitha shanset) për të marrë kreun e partisë Lega Nord. Një orë pasi Maroni kish shkruar këto fjalë në profilin e vet në facebook, doli lajmi se Umberto Bossi, tok me të bijtë, janë duke u hetuar për shpërdorim të fondeve publike të partisë për qëllime personale. Udhëheqësi historik i kësaj partie akuzohet se është pjesë e kësaj bëme korruptive, dhe se ka vënë nënshkrimin në lëvizjen e parave nga arka e partisë në duart e të bijve e në duar të të tjerëve.

Ky është lajmi i dytë që japim sot me motive të partisë ‘Lega Nord’. Lajmi i parë kish të bënte me Mario Borghezio-n. Ju kujtohet? Është ai i lajmit me titull “Borghezio ‘hakmerret’ për skandalin e Bossi-t, dhe lëshon gojën kundër shqiptarëve”.

Re.Pu.

Reforma zgjedhore ka ngecur në kompozimin e KQZ-së, në kërkesën për të hetuar kutitë, sa herë që ka dyshime për to nga palët dhe në çështjen e numërimit elektronik. Pse? Komentatori i shqiptares.com, Enton Abilekaj ka një shpjegim të vetin. Ja çfarë thotë ai në një shkrim të tijin të publikuar sot: “Berisha, ashtu si në refuzimin dyvjeçar për hapjen e kutive, kërkon t’i japë garanci [anëtarëve të] ushtrisë elektorale që nuk do të preken. T’i japë garanci në radhë të parë Ristanit që nuk do të pushohet pas veprës së 8 majit e tutje, t’u japë garanci ushtarëve të vegjël që mund të kryejnë adetet në qendrat e votimit pa pësuar gjë. Ndaj dhe ishte kundër dënimit maksimal për prishësit e procesit zgjedhor.”

Dhe më poshtë vijon: “Me kodin zgjedhor të pandryshuar, asnjë nga partitë e opozitës, por as LSI-ja e maxhorancës nuk duan të bëjnë zgjedhje… Nëse LSI-ja do të gjendej përballë kërcënimit të zgjedhjeve të parakohshme me kodin zgjedhor të pandryshuar, ndoshta në votimin e pestë do të ndryshonte mendje dhe do të detyrohej të shmangte zgjedhjet duke votuar Topallin. Edhe PS-ja, me kodin e vjetër, ndoshta nuk do të ishte e gatshme për zgjedhje të parakohshme në kushtet e mosrealizimit të kërkesës së saj për president konsensual. Kjo është arsyeja kryesore që e bën Berishën të bllokojë reformën zgjedhore dhe të akuzojë opozitën për bllokim.”

Re.Pu.

Kriza greke mund të thellohet e mund të ketë përthyerje të tjera. Pikërisht në këto orë, grekët që kanë llogari bankare janë duke u dyndur në dyert e bankave për të tërhequr depozitat nga frika e një zhvleftësimi (nëse kthehet Dhramia). Guvernatori i Bankës së Greqisë, Jorgos Provopoulos, ka shkuar urgjent në një takim te Presidenti i Republikës dhe e ka informuar se të hënën janë tërhequr nga bankat 700 milionë euro. Sipas burimeve bankare, edhe të martën është tërhequr e njëjta shumë. Presidenti ka nxjerrë një njoftim për shtypin lidhur me takimin që pati me guvernatorin, dhe aty thuhet se “nuk ka ende një situatë paniku, por janë gjasat që kjo frikë të shndërrohet në panik”.

E.G.

Mario Borghezio është i Legës së Veriut. Është anëtar i Parlamentit Europian, dhe dallohet për urrejtjen e  përbuzjen ndaj emigrantëve e ndaj myslimanëve, e ca më shumë ndaj emigrantëve që janë dhe myslimanë, sidozot një pjese shqiptarësh. Në Itali nuk është se i kushtojnë shumë rëndësi këtij personazhi butaforik, por është ai që shpesh herë çfarë nuk bën për të rrëmbyer vëmendjen e medias. Më së shumti hedh batuta banale folklorike.

Kështu ka bërë dhe në një intervistë në Radion 24 (që sillet në numrin e sotëm të shqiptares.com), ku u është vërsulur shqiptarëve për herë të n-të. Shqipëria është “vend i bukur, po t’i heqësh prej andej shqiptarët”, thotë ai mes të tjerash. Por më shumë e ka me burrat: “Ato pak herë që kam qenë në Shqipëri sipërmarrësit italianë atje më kanë thënë se ishin shumë të kënaqur nga gratë shqiptare që punojnë shumë, ndërsa burrat nuk bëjnë asgjë, rrinë gjithë ditën në kafene, janë kushërinj të afërt të arabëve”.

Re.Pu.