Emigrantët, çmallja me familjarët kushton 3.2 herë më shtrenjtë

Emigrantët që kanë telefonuar familjet e tyre gjatë këtyre tri javëve të fundit janë përballur me një rritje të kostos së telefonatës prej 320 për qind. Ky është lajmi që e përditshmja “Shekulli” ka botuar sot në ballë të faqes së parë. Në brendësi, shpjegohet se rritja e kostos ka ardhur për shkak të rritjes së tarifave të terminimit për telefonatat nga jashtë. Kjo situatë sipas gazetës përjetohet që prej datës 1 shkurt 2012, kur edhe ka hyrë në fuqi vendimi i Këshillit Drejtues të Autoritetit të Komunikimeve Eletronike dhe Postare për të liberalizuar tarifat e terminimit për telefonatat ndërkombëtare. Pas këtij vendimi, janë kompanitë celulare ato që vendosin vetë çmimin e shërbimit të terminimit të thirrjes që do mundësojnë klientit të operatorit të huaj. Referuar analizës së sotme, mësohet se tarifa mesatare për këtë shërbim ka qenë 0.05 cent /minutë, kurse pas datës 1 shkurt ajo ka arritur në 0.16 cent/minutë. Shkrimi i referohet situatës me të cilën po përballen emigrantët si edhe vendimeve të AKEP të zbardhura në faqen e saj të internetit.

S.E.